GAVANA bilong Sentral Provins Robert Agarobe i wok wantaim Kokoda Track Atoriti na Australia long kamapim gut saplai bilong wara, senitesen na haijin long ol ples insait long Sentral Provins.

Sentral Provinsal Gavman i wok strong long kamapim gut helt na senitesen long moa long 5,000 pipel.

Gavana Agarobe i givim K250,000 skel bilong em i go long dispela projek.

Gavman bilong Australia husat i patna wantaim Kokoda Inisitiv bai givim lojistikal sapot long projek.

“PNG na Australia i go het long wok wantaim long kamapim kwaliti laip long ol komyuniti long Kokoda Trek rijon. Ol 18 ples bai kisim tenk long bilong ren wara na nupela miting haus bilong komyuniti,” Mista Aragobe i tok.

“Dispela wok bai kisim moa long 200 wokman . Na bai kirapim tingting bilong pipel long wokmani,” em i tok.

Ekting CEO bilong Kokoda Track Atoriti (KTA) Julius Wargirai i tok wara senitesen na haijin infrastraksa em i bikpela samting long helt na bai helpim long stopim ol kain kain sik long kalap long ol narapela.

Dispela em i namba 3 bikpela komyuniti projek we KTA i mekim insait long rijon.

“Gutpela ekses long wara bai kamapim gut senitesen na haijin, na moa yet long dispela taim bilong COVID-19.

“Em bai daunim hevi ol mama na ol pikinini meri i save pilim long karim wara i go long haus bilong kuk na waswas,” Mista Wargirai i tok.

Projek bai stat long mun Ogas na bai pinis long Desemba.

Carolyne Ketsimur i raitim