MEMBA bilong Usino Bundi Jimmy Uguro i no amamas long sapot nesenel gavman I givim long Usino-Yal rot.

Em i tok olgeta yia gavman i save yusim moa long K5 milien i go long K10 milien long stretim rot namel long Usino Jangsen, Naru na Erima rot.

Em i tok nupela rot long Usino-Yal rot bai sevim gavman moa milien kina taim rot i kamap.

Em i mekim dispela tok long taim em i sekim ol wok long las wik.

Dispela rot bai ran long Usino gavman stesin na bihainim Ramu Veli i go daun inap em i bungim Madang-Midel Ramu Haiwe long Sogeram.

Uguro i tok distrik bilong em i redim pinis K25 milien long sapotim wok bilong rot.

Em i tok gavman aninit long Nesenel Plening Dipatmen i luksave long dispela rot olsem nesenel projek.

Em i tokaut olsem Usino-Yal rot em i wanpela ikonomik divelopmen rot na wan wan yia projek bai mas kisim K5 milien long mekim wok.

Tasol long nau yet no gat gutpela toktok o bekim i kam long Nesenel Plening Dipatmen o gavman.

Projek i no kisim mani long 2019 olsem na em i askim gavman nau long givim na long lukim wok i mas kamap.

Mista Uguro i tok tu olsem hap we dispela nupela rot bai go long em no gat planti maunten maunten o bikpela wara i stap long bagarapim rot.

Moa yet, Ramu nikel projek divelopa, Ramu NiCo Menesmen (MCC) Limited i ken bringim kromait bai-prodak bilong en long Madang na salim i go long ovasis na bringim mani i go long Madang Provinsal Gavman.

Long nau yet MCC i wok long yusim Lae pot long Morobe provins na salim kromait i go ovasis na takis mani i go long Morobe provins.

James G. Kila i raitim