HONIARA: FORUM Fisheries Agency (FFA) i selebretim wok bilong tupela wok meri husat i wok long kampani long 40 yia.

Tupela meri bilong Solomon Ailan .Davina Boso 67 na Susan Olisukulu 61 i bin stat wok long FFA long Julai 1980 taim kampani i stat.

Ol i bin stat wok olsem ol taipis taim FFA hetkwata i stap long Lengakiki, Wes Honiara. Tupela i wok aninit long 9-pela Dairekta Jenerel na 14 Deputi Dairekta Jenerel.

Tupela i stap 40 yia wantaim rijonal fiseris kampani na Misis Boso em i Office Support opisa na Misis Olisukulu em i Human Resource opisa.

Tupela i tok ol i amamas na tok tenkyu long lukim FFA i senis long nau.

“Planti samting i kamap long ol yia i kam na go. Na mi amamas long lukim FFA i go het wantaim ol senis,” Misis Boso i tok.

“Mipela i bin stat wantaim manuel taipraita. Nau i gat nupela infomesen teknoloji na FFA i kamap gut long wok bilong en,” Misis Olisukulu i tok.

Long makim olgeta wokmanmeri , FFA Dairekta Jenerel Manu Tupou-Roosen i tok tenkyu long Misis Boso na Misis Olisukulu long hatwok na komitmen bilong tupela long FFA.

“Em i hat long painim man o meri husat i ken givim laip bilong em long wok long wankain kampani long 40 yia. Mipela i amamas tru na tok tenkyu long  tupela spesel wokmeri.  Davinia na Susan. Dispela  em i bikpela samting tru long FFA histori,” Misis Tupou-Roosen i tok.

“Long soim amamas bilong kampani, mipela i givim nem bilong Laibri Konprens Rum long Davina Boso na Susan Olisukulu  long konprens rum,” em i tok.

Carolyne Ketsimur i raitim