JIVE maket em i wanpela lokal mobail aplikesen we ol lain i save yusim long baim na salim samting onlain long intanet.

Em i gat olgeta infomesen bilong bisnis na ol rot bilong putim oda na baim prodak yu laikim.

Dispela bisnis i bin stat long 2018 na i karamapim olgeta provins long PNG. Nau em wok wantaim PNG Pawa long ol kastoma husat i laik baim isi-pei, Digicel long kisim flex na Telikom long b-mobail top-ap o bilong salim.

Nau Jive Maket i patna wantaim BSP long e-komes ikosistem.

Papa bilong Jive Maket, Jaive Smare i tok dispela patnasip wantaim BSP em gutpela na bikpela samting tru long mipela na ol kastoma.

Nau ol i ken yusim ol kredit kat bilong ol long baim samting long Jive Maket.

Planti ol pipel bilong Papua Niugini husat i stap long narapela hap i wok long yusim dispela sevis long baim isi pei na mobail top up bilong ol famili bilong ol long Papua Niugini.

Ol manmeri   ken go  long dispela websait https://order.jivemarket.com/ o painim long Google play aplikesen long kisim OrderJivemarket aplikesen na yusim BSP Visa Debit kat o ol narapela benk kat long baim samting.

“Mi laik tok tenkyu long BSP long luksave long dispela aplikesen na mekim dispela patnasip. Mi singaut long ol narapela SME long kam na lukim BSP long sevis bilong em,” Mista Smare i tok.

BSP i askim ol bisnis long yusim onlain sevis na  sapotim olgeta proses bilong en.

Carolyne Ketsimur i raitim