JAMES na Amelia i save wok hat long lukautim kakau fam bilong tupela. Antap long em, tupela i gat 8-pela pikinini long famili.

“Mipela i save wok hat long tupela wik na kisim K60 tasol,” James i tok.

Tupela i gat 500 kakau diwai long Teop, Tinputz Distrik long Bogenvil.

Bipo James wanpela tasol i save wok long lukautim kakau fam na Amelia i save wok gaden na painim abus long solwara.

Maski tupela i bin painim hat taim, tupela i bin sevim mani bilong taim bihain bilong ol.

Long 2017, Amelia i bin go long wanpela trening bilong CARE International aninit long Bougainville Cocoa Families Sapot (BECOMES).

Trening i bin givim skul bilong kakao faming na pasin bilong man na meri long wok bung wantaim long egrikalsa.

“Dispela i bin opim ai bilong mipela. Taim mi kam bek long haus, mi tokim man bilong mi long kam bek wantaim mi long narapela trening,” Amelia i tok.

“Mipela i bin go wantaim long famili bisnis menesmen trening na long narapela taim mitupela i go long teknikel trening tu,” em i tok.

James i tok em i amamas tru long Amelia long strongim em long go long ol dispela trening.

Bogenvil gavman wantaim helpim bilong Papua Niugini Gavman, Australia na Nu Silan i bin sapotim dispela ol trening.

Dispela projek i helpim ol famili we i save kisim mani long kakau. Dispela bai helpim ol long kamapim gut ol bisnis bilong ol na menesim gut ol kakau fam.

James na Amelia nau i lukim planti gutpela senis long famili bilong ol.

Nau tupela i save wok wantaim long lukautim kakau fam. Ol i planim moa kakau diwai na ol i kisim moa mani bilong sapotim famili.

“Mipela i sanapim fementri pinis . Dispela i bin helpim mipela long mekim moa mani,” Amelia i tok.

“Liklik mani mipela i sevim, mipela i yusim long  salim pikinini meri bilong mitupela long pinisim gret 10 long Arawa Haiskul. Dispela i mekim mipela amamas tru,” em i tok.

CARE nau i luksave long tupela olsem ol model fama.

“Care i makim mipela bikos ol i lukim mipela i menesim gut kakau fam bilong mipela,”James i tok.

Carolyne Ketsimur i raitim