PRAIM Minista James Marape i tok gavman bilong em i mekim olgeta samting long pawa bilong em long opim gen Porgera Gol Main.

Em I tok, “Gavman bilong mi i no sek sek long wanem samting em i mas mekim long Porgera. Mipela i save long wanem samting mipela i laik mekim wantaim ol netserel risos bilong mipela stat long de mi mekim namba wan tok bilong mi olsem Praim Minista na tok bai mi mekim dispela kantri i kamap wanpela ris blak Kristen kantri.”

Em i mekim dispela tok long bekim sampela toktok i kam long Praim Minista bipo Peter O’Neil.

Mista Marape i bekim tu sampela toktok i kam long Barrick Gold na tok wanem samting gavman bilong em i mekim em i no bilong mekim Porgera Gol Main i kamap olsem nesenel kampani o long kisim ol propeti bilong kampani long yusim olsem samting bilong em.

Em i tok ol kampani na ol lain i holim maining lis bilong Porgera i bin mekim planti mani na profit long planti yia stat long 1989 i kam taim ol i kisim lis. Dispela lis i pinis long Ogas 16, 2019. Bihain konstitusen bilong Papua Niugini em i mas mekim disisen long gutpela bilong kantri na ol papagraun na lukluk long rot bilong kisim ol risos long gutpela wanbel bilong wok.

Taim Mining Advisory Council (MAC) i tok nogat long givim nupela laisens long Barrick Gol, gavman i bihainim dispela disisen na pasim Porgera Gol Main.

Tasol ol papagraun na Barrick Gold i no amamas long dispela disisen na planti toktok i go i kam.

Barrick Gold i kisim PNG gavman i go long kot long dispela.

Tasol Praim Minista i tok olsem gavman bilong em i no tok nogat long Barrick tasol em bai i toktok wantaim Barrick long nupela wanbel bilong wok.

Rosa Koian i raitim