GAVMAN i no givim gutpela luksave na mani sapot i go long turism indastri olsem sapot i bin stap bipo, Madang bisnisman na pastaim Madang Gavana Sir Peter Barter i tok.

Sir Peter husat i papa na Menesing Dairekta bilong Melanesian Turis Sevis i mekim dispela tok insait long wanpela kibung bilong Madang Travel Indastri Asosisin (MTIA) long las wik.

Dispela miting i lukluk long stap na wok bilong indastri insait long taim bilong coronavirus (COVID-19).

Ol lain husat i bin stap long dispela miting em ol lain i makim ol ges haus, lods, hotel na risot, edukesen institusen, polis na balus kampani.

Olgeta dispela lain i autim bel wari bilong ol insait long dispela taim nau we COVID-19 i kamapim lokdaun na pasim rot bilong ol turis long bringim nupela mani i kam insait long kantri.

Wanpela bikpela tok ol i bin mekim em long rot bilong strongim turism bisnis long Madang provins.

Sir Peter, husat i lida we i promotim ol wok insait long turis indastri planti yia i tok gavman long dispela taim i no givim gutpela luksave na sapot long turis indastri.

Em i tokaut gavman i lukim turism indastri i wanpela maina indastri tasol.

Sir Peter i askim gavman sapos gavman i ken helpim turism indastri na ol bisnis we i pas wantaim indastri na daunim ol takis long taim bilong COVID-19.

Em i tok dispela i wanpela rot gavman i ken sapotim indastri long dispela taim.

Em i tok sapos i nogat helpim, indastri inap dai.

Kibung i pasim tok long MTIA long kamapim wanpela plen we i lukluk long kamapim nupela logo o mak aninit long het tok ‘Beautiful Madang’.

Sir Peter i tok turis indastri i wanpela sastenabel indastri we i ken givim wok long ol pipel, promotim wok bisnis namel long ol pipel na bringim nupela mani long kantri.

Em i tok dispela i nupela rot we MTIA i toktok long kamapim we bai wok strong long promotim ol pasin tumbuna na kalsa bilong Madang long sait long turis indastri.

Sir Peter i askim olgeta lain long Madang husat i stap insait long hospitaliti na turis indastri long wok bung wantaim long dispela taim bilong COVID-19.

James G. Kila i raitim