BIKNEM oil na gas kampani long Papua Niugini, Oil Search i sapotim gavman long wok bilong pasim kamap bilong sik coronavirus (COVID-19) long kantri.

Kampani i no tokaut long hamas mani em i yusim tasol i tok em i givim olsem 250,000 pes mask; 100,000 medikel glav; 10,000 pes sil na 5 milien mililita han sanitaisa long gavman long dispela wik.

Kampani i tok em bai toktok wantaim Helt Dipatmen na givim dispela ol ikwipmen i go long haus sik long Hela, Sauten Hailans na Galp Provins.

Dispela helpim i arere long ol wok kampani na Oil Search Faundesen i save givim.

Oil Search Menesing Dairekta Dokta Kerian Wulff i amamas long gavman long kamapim ol lo long daunim na pasim COVID-19.

Em i amamas tu long ol lo em gavman i kamapim long lukim ol kampani i ken wok go het aninit long COVID-19 lokdaun.

“Oil Search i amamas long lidasip bilong gavman na COVID-19 Respons Tim long kamapim ol lo bilong banisim kamap bilong COVID-19,” em i tok.

“Long sapotim ol wok redi na plen, Oil Search bai givim ol pesenel protektiv ikwipmen (PPE) i go long lokal Provinsal Helt Atoriti).

“Mipela i wok poroman wantaim Helt Dipatmen na ol provinsal helt atoriti long givim dispela ol PPE i go long Hela, Sauten Hailans na Galp Provins na sapot ol i givim.

“Mipela i laik wok wantaim atoriti long lukim olsem mipela i givim ol samting i go long ol PHA bilong yumi, we i go wantaim COVID-19 plen.”

Dokta Wulff i tok Oil Search i mekim ol bikpela wok long lukim olsem ol opisa bilong em na ol manmeri we em i mekim wok i stap gut.

“Mipela i sapotim gavman na tingting bilong em long kamapim ol lo long banisim kamap COVID-19 bipo long bikpela hevi i kamap.

“Mipela bai go het long wok wantaim gavman long lukim olsem dispela sik i no kamap bikpela na i no bagarapim ol manmeri.