OL wel pam groa insait long kantri i askim ol memba bilong palamen long lusim han long ol wok bilong Wel Pam Indastri.

Dispela singaut i kamap bihain long Egrikalsa Minista John Simon i rausim tripela lida bilong Wel Pam Groa Asosiesen long bod.

Ol tripela lida em Deputi Siaman bilong Wel Pam Indastri Koporesen, Patrick Reu, Siaman bilong Wel Pam Groa Asosiesen, Oka Kamale na Siaman bilong Popondeta Wel Pam Groa Asosiesen, Arnold Koko.

Minista Simon i bin rausim ol na i bin givim ol tupela wik long tokaut long wanem as ol i no bin stap insait long Bot Miting long mun Me, long dispela yia.

“Egrikalsa Minista Mista Simon I givim mipela 14 de long tokaut long wanem as mipela i no go long Bod miting tasol olgeta dispela ol isu i stap long kot yet.

“Mipela i makim 15,000 man na meri i save planim wel pam long Noten, Milen Be, Bialla na Hoskins long West Nu Briten tasol mipela i hat long mekim wok bilong mipela gut long helpim gavman long winim plen bilong gavman long 2022,” Mista Reu i tok.

Em i tok ol memba bilong palamen i paulim wok bilong mipela wantaim politik bilong ol.

Mista Reu i tok mipela i no laik mekim politik, mipela i laik planim wel pam na bisi long dispela indastri.

Mista Reu i tok, “Mipela bai i bekim dispela pas bilong Minista long tokaut long wanem as mipela i no go long Bod miting.”

Long wankain taim, Presiden bilong Bialla Wel Pam Groa, Mista Kamale i tok, “Wel Pam i save putim 50 pesen bilong revenyu. Dispela em i moa long kopi na kakao i save mekim. Mipela i save mekim olsem K2million long olgeta yia.

“Mipela i pret long wanem ol memba bilong palamen i putim han long ol isu bilong Indastri bai i bagarapim ran bilong revenyu bilong Indastri.”

Mista Kamale i singaut long ol memba bilong Wes Nu Briten, Noten na Milen Be provins long helpim ol Wel Pam Groa na stretim dispela hevi.

Ol memba bilong Indastri i no amamas long dispela disisen long wanem i no gat siaman bilong Wel Pam Indastri Koporesen bod bikos dispela keis em i stap nau long kot.

Charlpetson Koi i raitim