PRAIM Minista James Marape i tok gavman i givim K165.5 milien long 89 distrik long kamapim gut egrikalsa na Small to Medium Enterprises (SMEs).

Wan wan distrik bai kisim K1 milien bilong egrikalsa na K500,00 bilong SMEs.

PM Marape i mekim dispela tok long Goroka taim em i lonsim Coffee Industry Corporation (CIC).

“Mi no toktok tasol, mipela i salim mani pinis long olgeta provins na distrik. Olsem na mi askim ol lain husat i raun raun nating long Pot Mosbi long go bek long ples na wok long egrikalsa,” Mista Marape i tok.

Em  i tok dispela mani i no bilong ol memba bilong palamen. Em i bilong egrikalsa na ol SME.

Mista Marape i tok moa olsem K200,000 bilong egrikalsa na SMEs bai go aut bihain long ol stretim gut rot bilong skelim i go long Nesenel Divelpoment Benk, Kina Benk na Benk Ov Saut Pasifik.

Em i tok gavman bai rausim olgeta samting we i  sanapim pasim egrikalsa, olsem politiks na larim egrikalsa indastri long sanap na gro long narapela level.

Mista Marape i tok  kopi na na egrikalsa indastri em ol bisnis na olgeta pipel i mas wok hat long dispela sekta.

“Gavman  bilong mi em i no laikim ol les man, mipela i laik ol pipel i mas wok hat,” Mista Marape i tok.

Em i tok ol Papua Niugini i stap olsem  ol namba wan lain bilong egrikalsa long wol na dispela i mas go het.