OL wokmanmeri bilong National Procurement Commision (NPC) i kisim tok long kamap hariap long wok long taim na mekim gut wok bilong ol. Sapos nogat bai kampani i mekim save long ol.
NPC Ekseketiv Opisa Simon Bole i mekim dispela tok long taim ol i holim miting long Pot Mosbi opis.
Mista Bole i tok wanpela sinia NPC wokman em i saspedim pinis bikos em i kam leit long wok long 3-pela dei na ol narapela mas lukim dispela na wok gut.
“Pablik Sevis Jenerel Oda 14 na 15 na spesel Jenerel Oda 11 i tok olgeta pablik sevens i mas kam long wok long taim, noken lusim wok na mekim wok gut long kamapim gutpela wok long kampani.” Mista Bole i tok.
“Aninit long lidasip bilong mi, mi laik bai ol wokmanmeri i mas harim tok, kam long wok long taim na mekim gut wok bilong ol long bringim ekspektesen bi long kampani,” em i tok.
Em i tok moa olsem em i gat log buk we em i save putim long resepsin bai olgeta wokmanmeri i sainim nem bilong ol long moning. Olgeta i mas kamap long 8 kilok.
“Mi save kisim log buk long 8:30. Husat i kam bihain long dispela taim em i leit na mi bai katim pei bilong em,” Mista Bole it ok.
Em i tok ol wokmanmeri i mas wok gut na kisim pei.
Mista Bole i tokim olgeta ekseketiv menesa bilong olgeta divisen long NPC long givim ripot i go long em bihain long tupela wik.
Ol wan wan wokmanmeri i mas bringim ripot bilong ol i go long ol menesa bilong ol na ol menesa bai givim long CEO.
“Dispela em bilong lukim pefomens bilong olgeta wokmanmeri na long luksave long wanem samting i gat nid long mekim. Astingting em long bringim gutpela wok long ol pipel na kantri,” Mista Bole i tok.
wantokniuspepa.com