KOMYUNITI lida na pikinini bilong  Memba bilong Gumine na Simbu bipo Jack Ninkama i askim Nesenel Gavman long brukim gut Nesenel Gavman Polisi  bilong SME bai ol pipel long ples i ken benefit long en.

“Ol  gavman polisi bilong bipo long ol SME i no save kamap long ol rurel ples. Nau Marape-Davies Gavman i wok  long strongim ol pipel  na dispela mani i mas go long ol lain husat i save mekim SME,” Mista Ninkama it ok.

Mista Ninkama i tok Nesenel Gavman i mas sapotim ol lokal Memba bilong palamen long distrik level long  bringim ol infomel sekta i go long fomal sekta.

“Yumi gat bikpela gep namel long infomal sekta wantaim ol lain husat i rejistaim ol bisnis aninit long SME. Olsem na informal sekta i no save kisim wanpela hap mani i kam long gavman,” Mista  Ninkama i tok.

“Salim samitng long strit em i no bisnis. Ol manmeri i save mekim olsem bilong kisim mani  long lukautim famili long wan wan de. Olsem na gavman i mas lukluk long stretim hevi bilong poveti na  helpim ol pipel long kisim ekses long dispela mani,” em i tok.

Mista Ninkama em i namba wan seketeri bilong Memba bilong Mosbi Not Is, John Kaupa .

Em i tok moa olsem planti nesenel bisnis ol ausait kantri i kisim na ranim long PNG. Sapos Nesenel Gavman i sanap strong long kisim bek PNG, em i mas lukluk long stretim dispela lo.

“Nau em taim bilong kisim bek olgeta stua na ol narapela liklik bisnis we ol ausait kantri i holim na givim long ol PNG pipel long ranim SME,” Mista Ninkama i tok.

Carolyne Ketsimur i raitim