NUPELA sistem nau bai helpim moa long 1500 ol kakao fama long Morobe, Madang na Is Sepik Provins.

Dispela sistem em ol i kolim Maket Divelopmen Fesiliti (MDF) em divelopmen patnasip program Australia kampani, Elliven Limited i givim.

Dispela sistem bai helpim long lukim ol rot na kwaliti em ol kakao na vanila fama i yusim i stret na i gutpela stat long taim bilong groim i go inap long pinis prodak i kamap long komsuma (kastoma). Na dispela sistem em ol i kolim tresabiliti.

Elliven Menesing Dairekta, Ron Neville i sainim wanpela memorandum ov agrimen (MoA) wantaim MDF PNG Kantri Dairekta Matthew Kanua long Pot Mosbi long las wik.

“Tresabiliti i bikpela samting long velu sen, na wantaim sapot bilong MDF, mipela i hop long luksave na strongim ol gutpela rot bilong kamapim ol wok na givim kwaliti sevis long ol manmeri,” em i tok.

“Dispela long apim tu namba bilong prodaksen na mak bilong kwaliti i go antap long egrikalsa sekta.

“Dispela bai kamapim taim long ol produsa i ken wok gut wantaim ol ekspota long bungim laik bilong ol kastoma long taim.”

Mista Neville i amamas tu long kampani bilong em i givim kain sapot.

“I gat ol baia long long intenesel maket husat i wok long painim ol gutpela kwaliti kakao na vanila prodak,” em i tok.

“Wantaim inap infomesen (toktok) long ol saplaia bilong ol fama na ol lain i menesim sistem, mipela inap long kamapim saplai sein we i ken kamapim gutpela kwaliti bilong kakao na vanila.

“Dispela bai helpim tu ol smolholda fama bilong mipela gut.”