“TAIM yumi putim tingting long kamapim gut indastri, yumi mas putim tingting tu long inves long risets,”

Minista bilong Egrikalsa na Laipstok na Memba bilong Maprik John Simon i bin mekim dispela toktok taim em go lukluk raun long Kokonas Indastri Kopresen long Murunas long Madang Provins.

Dispela risets stesin i bin kamap aninit long PNG Kakao na Kokonas Risets Skul bilong groim ol nupela kain kakao na kokonas na ivaluesen stadi na egronomi na entomoloji risets.

Ol stadi i tok kopra em i namba foa egrikalsa kes krop bilong PNG. Moa long 2.6 milien manmeri i save wok kopra long PNG.

Minista John Simon i bin kamap long Madang las wik long lukluk raun long ol bikpela projek aninit long DAL.

Em i tok risets institiusen i impoten bikos wok bilong ol bai helpim indastri long kamap gut.

Em i tok moa olsem em i bin tingting long mekim dispela projek bilong helpim ol hevi i kamap long indastri. Ol hevi olsem, plantesin i bagarap, na bilong wanem na kes krop indastri i no gro taim PNG i gat planti kes krop.

Mista Simon i amamas long wok i kamap long Murunas. Em i tok, ol wokman i lukautim gut dispela stesin moa long ol narapla stesin long kantri.

“Dispela ol institusen gavman i lukautim. Praim Minista i tok mani i stap long indastri na yumi mas strong long painim mani yumi yet. Na wanpela rot bilong mekim dispela em long mekim wok painimaut long ol gutpela rot bilong mekim mani long ol komoditi,” Mista Simon i tok.

Em i tok moa olsem opis bilong em i redi long sapotim ol divelopim indastri long pasin bilong groim kes krops.