BSP PNG i givim K40,000 long Pot Mosbi Nature Park olsem sponsa bilong 2020 BSP Trash to Treasure Sculpture Festival.

Dispela festival i sapotim skalpsa we ol i mekim long tin, botol, raba na plastik.

Olsem hap bilong benk Go Green kempen, BSP i amamas long sapotim tingting bilong lukautim envairomen na givim sapot long mekim sastenebel komyuniti.

“BSP i luksave long hevi bilong envairomen na em i redi long painim rot bilong daunim ol dispela hevi na long banisim bai ol pipel i ken stap long gutpela na klinpela envairomen,” BSP Kopret Sponsasip Menesa Amelia Minnopu i bin tok long taim em i givim sek mani i go long Pot Mosbi Nature Park.

Em i tok moa olsem, BSP i save sapotim tu ol narapela Pasifik Ailan kantri we BSP i wok long en. BSP i save helpim long ol projek olsem, Skul biutifikesen, Wol Envairomen de, Wol Et de na ol narapela.

Ms McGeorge i tok tenkyu long BSP long sapot bilong em.

“BSP Trash to Treasure Sculpture Festivel em i bilong skulim ol lokal pipel long pasin bilong yusim ol plastik long mekim ol skalpsa long Pot Mosbi,” Ms McGeorge i tok.

Em i tok moa olsem long dispela yia 2020, festival bai gat ol skul resis.

BSP “Trash to Treasure Sculpture” Festivel bai kamap long namba 4 Julai i go inap long namba 30 2020.

Carolyne Ketsimur i raitim