KOST bilong stap long siti em i antap tru.

Planti pipel we i stap long siti ol i nogat wok tasol ol i mekim ol liklik maket bilong ol long stap laip.

Planti bilong ol yut na mama i save sindaun long strit na salim ol liklik samting long kisim mani.

Liklik lain tasol i gat wok. Na em i bikepela hevi tru long lukim planti bisinis bilong ol ausait kantri na nogat helpim i go bek long ol pipel i stap long setelmen.

Ol mama bilong Mosbi Not Is distrik i amamas tru taim lokal memba John Kaupa i tok aut long K2 bilien we bai em i givim long helpim ol meri long mekim ol liklik bisinis bilong ol.

“Las yia Small Medium Entrepreneur (SME) i bin helpim 400 mama long distrik. Nau ol dispela meri i mekim ol liklik bisnis bilong ol na i wok long gro isi isi. Long 2020, Distrik Divelpomen Atoriti (DDA) bilong yumi i sainim K2 milien aninit long Ikonomik sekta bilong Distrik Sevis Imprivmen Program (DSIP) long helpim ol meri long distrik bilong mi,” Mista Kaupa i tok

Mista Kaupa i bin go lukim lonsing bilong bisnis grup bilong 5-pela meri long wildlife komyuniti.

Ol dispela bisnis grup em, Baiyer Women in Business, Goroka Gomen in Business, Kere Women Grup, Hagen Women in Business na Bomana Portion 683 Women Asosiesen.

Mista Kaupa i tok SME i kamap gut tru long distrik bilong em bikos em i sapotim ol mama gut bai ol i ken gat gutpela sindaun long komyuniti.

“Yumi olgeta i laikim mani long stap long siti. Tasol yumi i no inap long kisim mani long isi rot. Yumi mas wok hat na kisim.”

“ Ol distrik opisa i kisim olgeta rejista grup pinis na namba i moa long 70. Bihain bai ol i sekim gut olgeta pepa wok na go het long lonsim ol dispela bisnis long Sir John Guise stedium wantaim helpim i kam long NCD Gavana Powes Parkop.” Mista Kaupa  i tok

“Astingting bilong dispela em long sapotim ol mama. Planti bilong ol i painim hevi long traim putim kaikai long tebel bilong famili. Distrik bilong mi i redi long karimaut dispela program. Mipela i lukluk long  grasrut level na mi askim Nesenel Gavman long helpim mama long Pot Mosbi,” Mista Kaupa i tok.