MOROBE Provinsal Gavman aninit long lidasip bilong Ginson Saonu i laik sanap long strongim Lae City Atoriti (LCA).

Gavana Saonu  i sainim 20 pesen bilong guds na sevis takis (GST) wantaim Internal Revenue Commission (IRC) long kamapim gut Lae city.

Long taim LCA i bin stat long 2015, i no bin gat gutpela arensmen bilong ol atoriti long wok wantaim.

Morobe provins i save givim namba tu bikpela revenyu long kantri. Na sampela dispela mani i kam long  takis na i mas go bek long Morobe provins gavman long givim sevis bek long ol bisnis i save baim takis. Tasol dispela i no save kamap.

Praim Minista James Marape i bin witnesim Gavana Saonu taim em i sainim 20 pesen bilong GST i go bek long LCA.

IRC i save givim 60 pesen bilong GST i go bek long olgeta provins. Dispela i save kamap long 21 dei bilong olgeta mun. Em bilong helpim ol provins long gat inap mani taim ol i wetim mani bilong ol long  Nesenel Gavman.

IRC Komisina Jenerel Sam Koim i bin karimaut dispela saining na i tok tenkyu long  Praim Minista James Marape  long givim lidasip bilong em long mekim dispela i kamap. Na em i tok tenkyu tu long Gavana.
“Mi laik lukim hap mani bilong takis i go bek long ol provins. Na dispela hap mani i mas go long ol komyuniti bai ol takis peia i amamas na go het long baim takis,” Mista Koim i tok.

Minista bilong Lands na Siaman bilong LCA John Rosso i tok dispela arensmen bai givim inap fanding long LCA long karimaut lo projek bilong en.

“Lae siti i save givim planti mani long kantri, tasol mani i no save helpim bek provins. LCA sistem em gutpela. Em bai pusim yumi long kisim moa mani. Ol pipel i save baim takis i mas kisim sevis tu. Dispela em i stat bilong planti gutpela samting we bai i kam,” Mista Rosso i tok.

Em i tok moa olsem Morobe i gat gutpela gavana husat i gat gutpela tingting na em i tok orait long serim GST.

Minista i tok tenkyu long Praim Minista James Marape long stap na witnesim dispela wok.

Gavana i tok dispela em i namba wan taim dispela kain samting i kamap.

“Taim mi bin kisim opis, mi bin laik lukim senis long rot we  yumi mekim bisnis. Sapos yumi mas sakrifais yumi mas mekim. Bai yumi ken lukim senis. Taim mi bin sanap long Ileksen, mi bin tok “KISIM BEK MOROBE”. Tasol bikpela samting em kisim bek Lae siti pastaim,” Mista Saonu i tok.

PM Marape i amamas tru long wok bilong gavana.

Carolyne Ketsimur i raitim