GAVMAN bilong Amerika i bin givim trening long Papua Niugini Pawa limited (PPL) las wik.

Dispela trening em bilong helpim PNG Pawa long kamapim gut eneji sevis long ol pipel bilong Papua Niugini.

“Dispela trening bai strongim PPL long mekim gutpela eneji infrastraksa na mekim strongpela faundesen bilong gavanens. Em i bikpela wok bilong mipela  olsem patna bilong PNG pawa long kamapim gut  ilektrifikesen long Papua Niugini,” Amerika Embasada bilong PNG, Solomon Ailan na Vanuatu Erin McKee i tok.

USAID  Sekta Rifom na Utility Commercialization (SRUC)  i bin stretim dispela trening. Astingting bilong trening em long kamapim gut eneji revenyu bilong ol kastoma na redi long nupela mita data menesmen sistem.

Moa long 40 PPL wokmanmeri i bin kamap long dispela trening.

USAID tim i bin givim ol strongpela tingting long rot bilong kamapim gut entri menesmen  bilong  ol  data na rot bilong mekim sevei.

PPL i givim tok amamas long trening ol i bin kisim na i givim tok orait long  kamapim intanel tim long lukluk long  kamapim infomesen bilong ol kastoma na mekim taimlain bilong databeis.      

Carolyne Ketsimur i raitim