LONG Epril planti milien Hindu i bung long Haridwar,  wanpela taun long Himalaya maunten, India long stap long Kumbh Mela festival tasol planti i pret dispela bung bai i kamap wanpela bikpela haiwe bilong COVID-19 I spred.

Dispela festival i kamap long taim India i pait wantaim namba tu raun bilong COVID-19.

Bihain long Kumbh Mela festival sampela pipel husat i kam bek na i sik wantaim COVID-19 i tok ol pret toktok bilong COVID-19 i ken spred long kain taim na kain bung olsem em i tru.

Ol pipel husat i kamap long dispela festival i kam long planti hap bilong India.

Taim Mahant Shankar Das, wanpela Hindu pris i bin kamap long Haridwar long Mas 15 long stap insait long dispela festival. Long dispela taim namba bilong COVID-19 i bin stap antap tru pinis.

Foapela de bihain long em i kamap, Mahant Shankar Das husat i gat 80 krismas i tes positive long COVID-19 na ol helt woka i tokim em long stap long kwarentin long haus sel bilong em.

Tasol em i no mekim olsem. Em i pulamapim ol beg bilong em gen na kalap long wanpela trein na ran 1,000 kilomita i go long Varanasi siti.

Long Varanasi siti pikinini man bilong em, NagendraPathak i kisim em na tupela i kalap long wanpela taksi na ran 20 kilomita go long ples bilong ol.

Mista Pathak husat i kamap orait gen long COVID-19 i tok ples bilong ol i lukim 13 indai pinis long kus na fiva insait long tupela wik.

Ol helt opisal i tok dispela ol indai we i kamap o i no kamap bikos long Mahant Das tasol pasin em i mekim i no risponsiebel. Em I bikhet na ran long trein em I pulap tru na long taksi wantaim pikinini man bilong em.

Wanpela dokta, Dokta Lalit Kant i tok bikpela grup manmeri i sindaun arere long wara Ganges na I no werim mask na singsing i kamapim wanpela gutpela envairomen tru bilong vaires long spred hariap tru.

Long Haridwar, ol helt opisal i tok 2,642 pipel i tes positiv long COVID-19 na planti bilong ol em ol bikpela rilijus lida.