LONG Janueri dispela yia wanpela Katolik pris na saientis i bekim sampela askim em i wok long kisim long COVID-19.

Profesa Pater Nicanor Austriaco i bin bisi tru long wok bilong COVID-19 menesmen long asples bilong em Filipins tasol em i painim taim long bekim ol askim taim planti kempen bilong no ken kisim veksin i go bikpela.

Em i tok, “Taim Moderna COVID-19 veksin i bin redi long ol pater na ol wok manmeri long Providens Koles praiori long Amerika, mi bai kisim dispela veksin long Februeri. Na taim wanpela veksin i redi long Filipins bilong mama bilong mi, mi bai strongim em long kisim.”

Pater Austriaco i tok ol veksin bai i seivim ol laip na banisim helt kea sistem bilong yumi. Ol bai i pinisim pandemik na rausim ol lokdaun na bagarap long sindaun bilong yumi.

Narapela samting em olsem mi trastim saientifik proses we ol saintis i yusim long kamapim na testim ol veksin, Pater Austriaco i tok.

“I tru ol veksin i bin kamap hariap tru tasol em i mas kamap. Long dispela taim, taim ol saientis i gat planti mani nau long mekim wok na nogat moa arapela wok long mekim long taim bilong pandemik, ol i bisi long kamapim veksin.

“Moa yet ol veksin i kamap bihainim planti yia wok risets, em i tok.

Pater Austriaco i tok ol saientis i save long mRNA moa long 50 yia pinis na em i no nupela samting. Mipela i no kirap tasol wanpela moning na kamapim veksin. Mipela i save long ol RNA vaires, na namba tu klas bilong en em ol coronavirus.

Ol eksperimen i kamap long planti yia na planti saientis i givim planti taim bilong ol long kamapim ol veksin we nau ol i tilim raun long wol. Planti gutpela wok bilong saiens i go insait long dispela wok na planti biknem saientis i bin helpim long mekim dispela wok.

Planti pipel i pret long kisim ol veksin bikos ol i tok veksin i bin kamap hariap tru na nogat tes. Pater Austriaco i tok em i tru tasol dispela inap kamap hariap long wanem ol gavman i givim planti mani tru long ol saientis i mas kamapim marasin hariap long wanem ol pipel bilong ol i wok long kisim taim na sampela i dai long COVID-19. Ol i bin inap mekim ol tes long ol veksin hariap tru long wanem planti tausen manmeri i voluntia na sanap long lain long helpim wok kamap bilong dispela ol veksin.

Olgeta pipel husat i bin voluntia long tes bilong veksin i bin soim olsem veksin inap banisim SARS-CoV2 vaires.

Sampela pipel i laik save sapos dispela ol veksin bai i kamapim hevi long bodi bihain long ol i kisim.

Yes bai i gat sampela samting i kamap. Pater Austriaco i tok taim em i kisim veksin, em i save em bai i gat liklik sua long han bilong em. Em i save tu olsem bai em i kisim liklik fiva na pilim skin dai long liklik taim, tasol em ol sain olsem veksin i wok. Em ol sain we i soim olsem veksin i kirapim banis sistem bilong mi long kamapim ol soldia long bodi bilong mi long was long binatang bilong COVID-19 sapos em i kam long mi.

Pater Austriaco i tok olsem ol pen na pilim nogut em bilong liklik taim tasol na i no kamapim wankain pen we bai i kamap taim COVID-19 i kisim yu.

Olsem wanpela Kristen mi kisim skul olsem long sakrifais tasol yumi inap stretim ples bilong yumi, dispela wol we i bruk pinis. Dispela em i mining bilong kruse.

Profesa Pater Nicanor Austriaco em bilong Filipins na nau em i stap long Amerika. Em wanpela molekula baiolojis na katolik pris na em i Profesa bilong baioloji na tioloji long Providens Koles, Rhode Ailan.

Dispela em i hap bilong longpela stori bilong em i stap long Church Life Journal.