LAS wik Fraide Belgium Global Sea Mineral Resources (GSR) i statim bek ol wok bilong en bihain long em i painim Patania II, wanpela robot bilong en we i bin lus long Trinde.

Patania II i bin wok daun tru long as bilong Solwara long mak bilong 2.8 mails insait long Clarion-Clipperton Zon – wanpela draipela hap Solwara namel long Hawaii na Mexico.

Sais bilong dispela Solwara em i wankain olsem kontinen bilong Amerika.

Dispela maining wok i kisim ol mineral bilong mekim batri.

Long Trinde las wik GSR i bin ripot olsem Patana II i bin lus. Hevi bilong dispela robot em 25 tan. Em i bin stap long 3.1 mails longwe long mama sip we i sindaun antap long Solwara na i lus long 5 kilomita kebol we i holim em wantaim sip.

Wanpela baiolojis bilong bik Solwara long Greenpeace Jemeni Sandra Schoettner i tok, “em i no stret olsem wanpela  indastri i laik mainim ol mineral long sibed i pundaunim robot bilong ol long dispela hap.”

Em i tok, “Dispela piksa i soim stret dispela kain operesen bai i no inap wok gut na em i bikpela tok lukaut olsem sibed maining em i gat bikpela risk.”

Menesing dairekta bilong GSR Kris Van Nijen i tok, “Mipela i isi na lukaut long ol hevi long projek divelopmen. Mipela i mekim ol trail long klia gut long ol salens na mipela i ken mekim gut ol masin bilong mipela.”