POP Francis las wik i givim tok bilong em long Mama Graun De (Earth Day).

Em i tok planet (Ples Graun) i stap long mak bilong bagarap olgeta na ol pipel i mas abrusim rot i go long bagarap.

Stat long taim Katolik sios i makim em i kamap Pop long 2013, em i bin mekim planti singaut long pipel i mas lukautim envairomen nap les graun.

Insait long tupela vidio toksave em i bin mekim, wanpela bilong Mama Graun De na narapela bilong Wol Klaimet Samit we Presiden bilong USA Joe Biden i holim.

Pop Francis i tok, “Nau em i taim bilong kirap na mekim samting. Yumi stap long arere pinis na klostu long bagarap olgeta.”

Em i tok namel long ol hevi bilong COVID-19 na klaimet senis ol pipel i mas no ken go het yet long rabisim netsa long wanem em (netsa) i no inap pogiv moa.

Taim netsa i kros na em i kirap na bekim em bai i hat tru long stopim. Tasol yumi gat taim na yumi ken wok long stretim ol samting, em i tok.

Taim yumi lusim taim nogut, yumi no inap kamap long wankain mak olsem bipo. Nogat. Wanem samting yumi wokim bai yumi kamap orait o bai yumi bagarap olgeta. Em salens. Na sapos yumi no kamap orait, yumi bai bihainim rot bilong bagarap tasol.

Em i tok nau em i taim bilong mekim kamap ol nupela tingting na nupela pasin na ol politikel lida i mas kirap na mekim senis wantaim strong na jastis.