MIS Solomon Ailan 2019/2020 Gladys Habu i sori tru Solomon Host na Mis Solomon Ailan Pejien (MSIP) i rausim em olsem Mis Solomon Ailan.

Em i tokaut long Facebook long tok klia long ol sut toktok i go long em olsem em i yusim MSIP pletfom long mekim mani bilong em yet.

Mis Habu i tok dispela ol toktok i no tru.

Em i tok em i bin askim long wanpela kontrak long Solomon Host na MSIP long tok klia long ol risponsibiliti bilong em taim em i stap olsem Mis Solomon Ailan tasol em i no bin kisim o sainim wanpela.

Long 7 Oktoba 2019 em i bin sainim wanpela wanbel fom long go insait long MSIP.

Em i tok taim em i stap olsem Mis Solomon Ailan em i givim taim bilong em na olgeta wok em i wokim em i volunteri na i no gat pe long en.

Tasol em i bin kisim wanpela komesel kontrak we em i helpim long promotim ’Buy Lokol’ wanpela kempen bilong promotim lokal bisnis long Solomon Ailan. Em i tok em i bin askim Solomon Host na MSIP long stap insait tu tasol em i no kisim bekim.

Em i tok tu olsem em i no bin kisim kontrak wantaim Bulk Shop, Kokonut Pacific na UNDP Solomon Ailan olsem ol sut toktok i bin tok.

Mis Habu i bin go insait long resis bilong Solomon Ailan taim klinik bilong kensa long Nesenel Referel Haus Sik long Solomon Ailan i bin askim em.

Em i sori olsem planti gutpela samting i bin kamap long taim em i stap na kain ol tingting na sut toktok i no inap helpim Solomon Ailan.

Em i laikim MSIP i mas stretim gavanens bilong en na ol yangpela meri i go insait long dispela wok i ken klia gut long ol wok na risponsibiliti bilong ol.