OL haus sik long Delhi, India i pulap tru, ol i tok strong long ol pipel i mas painim  narapela rot long helpim ol COVID-19 sikmanmeri long haus.

Planti pipel i go long ol blak maket long kisim helpim tasol prais bilong ol marasin ol i nidim stret, oksijen (win) botol na konsentreta i antap tru. Sampela pipel long blak maket i salim sampela marasin we ol medikol lain i gat askim long en.

Long Mande dispela wik India i mekim wol rekot long stap antap yet wantaim bikpela namba bilong nupela sik COVID-19 keis long 5-pela de olgeta.

Em i rekotim 352,991 keis long 5-pela de tasol.

Ol nes na dokta i sotwin tru tasol sampela i givim taim bilong ol long helpim ol famili husat inap peim mani long lukim ol COVID-19 sikman o sikmeri long haus.

Tasol planti arapela i panim hat tru long kisim helpim.

Nau India i kisim helpim long ol arapela kantri long wanem em yet i sot tru long ol samting bilong helpim ol sikmanmeri.

Planti ol COVID-19 sikmanmeri i dai long wanem i nogat moa oksijen botol long helpim ol.

Na sapos ol lain i mekim tes em i save kisim tripela de long ol risal i kam bek na dispela i save mekim hat long ol dokta long skelim kondisen bilong sikmanmeri na helpim ol hariap.

India I gat 1.39 bilien pipel na bikpela siti bilong en Delhi I gat 31 milien pipel.