OL Fiji atoriti i kisim was gen nau na i putim ol strongpela mesa long hariapim kontek tresing wok bihain long ol i kisim moa long 330 kontek long tupela keis ol i ripotim i no longtaim i go pinis.

Dispela tupela keis i kamap namel long tupela taun bilong Nadi na Lautoka. Ol i painim wanpela soldia na wanpela wokmeri bilong hotel i gat COVID-19 long las wiken.

Ol i luksave olsem dispela tupela keis i kamap long boda olsem na ol i pasim boda bilong tupela taun stat long 4 klok moning long Mande dispela wik na ol i tambu long ol pipel i go i kam namel long tupela taun.

Ministri bilong helt i tok long wanpela stetmen bilong en olsem ol i painim namba jeneresen kontek bilong tupela keis ya.

Na long Mande moning, wanpela kontek bilong ol namba wan jeneresen keis, tes bilong wanpela meri husat i gat 53 krismas i rejista olsem positiv COVID-19.

Dispela meri i save wok long kwarentin fesiliti long boda tasol em i bin go long ol pablik spes tu. Em i save stap long Nadi na i save go kam long Lautoka.

Olgeta memba long haus bilong e mi stap nau long kwarentin. Na ol i wet long ol tes risal bilong ol.