EPRIL 26 em spesel de bilong ol pipel bilong Australia na Nu Silan.

Maski ol I stap long narapela ples ol i save luksave long dispela de long tingim sevis na sakrifais ol man na meri soldia bilong ol i bin mekim to seivim kantri bilong ol.

Em I de tu ol i tingim husat ol lain ol i bin wokabaut wantaim na pait wantaim long bikpela Wol Woa 2.

Long dispela moning sampela i bung long graun bilong Koiari long Bomana Woa Matmat. Em i wanpela spesel ples tru bilong ol pipel bilong Australia.

Dispela matmat em i wanpela bikpela matmat tru ausait long Australia we ol i planim ol soldia bilong Australia husat i dai long Wol Woa 2.

Bikos long COVID-19 dispela seremoni i bin liklik tasol ol lain makim ol patna na pren bilong Australia i bin kamap. Sampela dispela ol lain i kamap em PNG Praim Minista James Marape, Sif bilong Difens Meja Jeneral Gilbert Toropo, Sekreteri bilong Difens Dipatmen John Akipe, Nu Silan Hai Komisina Pilip Taula na ol arapela.

Planti ol pipel bilong Australia na Nu Silan husat i stap long PNG i bin stap long haus na holim vijil long tingim ol husat i bin dai long woa. Sampela i bin go antap long ol mauten na lukluk long seremoni i kamap long Bomana Woa Matmat.