WANPELA lidameri long Bogenvil we wanpela komyuniti bilong en i wok long bungim hevi long sait long posin pipia, i askim long wanem taim bai ol bikpela kantri, ol koporet kampani na ol lida bilong ol wantaim bai stopim pasin bilong buli long ol.

Memba bilong Ioro Konstituensi long Sentral Bogenvil, Theonila Roka Matbob i askim bihain long em i harim olsem gavman bilong Japan em i laik rausim wan milien tan poisin pipia wara i kam long Fukushima nuklia birua, i go insait long solwara bilong Pasifik.

Klaimet Jastis Projek Opisa bilong Pacific Islands Climate Action Network, Lorenzo Raplili bilong Vanuatu tu i tok wanem samting Japan i laik wokim em egensim human rait bilong ol pipel long Pasifik we i wok long bungim hevi pinis long sait bilong klaimet senis.

Dispela tingting bilong Japan em i mekim planti long ol rijonal ogenaisesen olsem Pasifik Ailan Forum sekretariat, Sekretariat bilong Pasifik Komyuniti, ol enviromen ogenaisesen na sampela lida ol i tokaut strong egensim.

Dispela ol redioektiv wara ol i nau putim insait long moa long 1,000 tanks - tasol ol i nogat moa spes long putim olgeta posin pipia.

Na Japan em i tingting long stat long rausim dispela wara insait long tupela yia - na i tok bai ol i putim marasin na stretim gut pastaim long ol i rausim olgeta redioektiv posin. Tasol ol bai i no rausim wanpela samting ol i kolim tritium.

Japan i tok level bilong redioektiv posin bai i liklik aninit long mak we World Health Organisation i orait long en olsem na em i seif insait long wara bilong dring.