Wanpela lida meri long Papua New Guinea i tok em i wari olsem sik COVID-19 nau I wok long kamap olsem wanpela samting ol pipel i bilip olsem em i kamap long pasin soseri o sanguma.

Dokta Fiona Hukula, husat i bin wok bipo olsem wanpela risetsa long National Research Institute, i mekim dispela toktok taim em i bin lusim dispela wok blong en long wik i go pinis.

Soseri sut toktok na kamapim vailens i wanpela bikpela wari long PNG we planti taim ol pipel i save kilim ol narapela bihainim ol tokwin olsem sampela pipel em ol sanguma lain.

Dokta Hukula i tok em i amamas long lukim olsem planti gutpela meri lida na ol sios tu i wok hat long daunim dispela wari, na planti pipel i wok long tok ol Sanguma lain i kamapim dispela sik COVID-19.

Bogenvil i wanpela namel long tripela ples long PNG we dispela kain hevi I wok long stap long en. Na tu we sampela pipel i lusim pinis laip bilong ol bihainim ol tokwin olsem ol i sanguma lain.

Helen Hakena, meri i go pas long Leitana Nehan Divelopment Ejensi long Bogenvil i save wok long traim daunim dispela hevi na em i tok, nau sampela pipel i sutim tok long ol arapela pipel bilong ol arapla kantri i bringim dispela sik i go insait long Bogenvil na tu long bikples PNG.