OL 180 man na meri bilong Enga, Madang, Nu Ailan provins na Nesenel Kepital Distrik we i stap insait long leba mobiliti program bilong Australia olsem ol sisenal woka i bin bung long Pot Mosbi long mekim ol wok kwarentin.

Tasol maski ol i redi long kam long Australia long wok, Australia gavman i putim ol tambu o stopim ol balus long PNG i go long Australia bihain long sampela woka bilong Ok Tedi Main i bin tes positiv long COVID-19 long Queensland.

Lynna Joel em i wanpela trena bilong ol dispela PNG woka na em i tok planti ol man na meri insait long dispela program em ol yut na ol lain i kam long ples long go wok long ol fam long Australia.

Em i tok ol i bin bihainim olgeta kwarentin edvais long redim ol yet, tasol nau i nogat rot long trevol I go long Australia wantaim ol COVID-19 tambu.

Alex Lepan em i wanpela yangpela man long wanpela rurel komyuniti long Nu Ailan Provins.  Em i tok, i hat tru long em yet i painim wok long provins bikos i nogat wok bilong em yet olsem wanpela mekanik. Em i tok dispela program bai i ken opim rot bilong sapotim em na famili bilong em taim em kam long wok long Australia.

Perpetua Tagor em i wanpela yangpela meri bilong Nu Ailan provins tu na em i save wok gaden long helpim long sapotim famili bilong em bihain long em i bin pinisim skul. Em i tok dispela leba mobiliti program bai i ken helpim ol yut long divelopim provins, komyuniti na ikonomi bilong kantri wantaim mani ol bai kisim long ol wok long Australia.

Em i tok em i gat bilip olsem, wokbung aninit long dispela program namel long PNG na Australia bai stap strong yet na opim rot bilong planti yangpela pipel long go long Australia na wok long bihaintaim.

Long Madang provins tu i gat planti ol woka husat i bin bungim hevi taim ol i no go long Australia maski ol i bin mekim pinis olgeta wok redi long go wok.

Jack Taraika husat i go pas long stretim olgeta wok redi long ol woka long Madang i tok, maski i gat hevi, ol i mas bihainim ol askim bilong gavman bilong Australia wantaim hevi bilong COVID-19.

Em i tok planti ol lain i jonim dispela leba mobiliti program em ol i save wok long ol kampani bilong mekim tinmit long provins yet na sampela I bin lusim wok bilong ol long kam long Australia.

Ol i bin traim long toktok wantaim ol PNG gavman minista na Australia Dipatmen bilong Foren Afeas na Tred tasol ol i no kisim bekim.

Hilda Wayne i raitim