PATER bilong St Anne Peris long Dirima, Gumine long Simbu provins, Pater Peter Kim i sanap na i go pas long helpim ol perisina bilong em long lukautim ol yet long COVID-19.

Pater Kim wantaim ol paris kaunsil i bin bungim mani na ol i baim laplap bilong samapim 1, 000 mask bilong ol perisina na ol bai samapim moa yet.

Paris i bin kontribiut long givim masin bilong samap na 5-pela meri bilong Dirima komyuniti husat paris i bin trenim ol long samap i givim taim bilong ol samapim ol mask.

Tupela seminari, Anthony Luc (SVD) na Billu Bruno (Daiosisen) husat i stap long pastoral wok bilong ol i givim taim na han bilong ol tu long helpim paris.

Long dispela taim, i no gat COVID-19 yet long Dirima- Yani eria long Gumine distrik. Tasol ripot i kam long Sir Joseph Nombri Memorial haus sik long Kundiawa olsem i gat moa long 50 keis na tupela i dai pinis.

Pater Kim i tok em i wari tru long ol perisina bilong em olsem na em i kamap wantaim dispela tingting long givim aut mask long ol pipel bilong lukautim ol yet taim ol i raun.

Em i tok ol helt fesiliti long distrik i no inap helpim olgeta pipel sapos ol i kisim COVID-19. Olsem na i gutpela long banisim dispela sik long spred.

Long dispela taim tu, ol infomesin i kam long gavman i no wok long kamap kwiktaim long Gumine distrik. Olsem na man husat i raitim stori i askim ol lida bilong 5-pela kaunsil wod we i gat 9, 000 manmeri na pikinini long kamapim ol mesa bilong kontrolim ol pipel long abrusim COVID-19.

Em i tupela wik i go pinis na i no gat ol mesa yet i kamap. Pater Kim i mekim hap bilong em long samapim ol mask bilong ol perisina tasol dispela i no inap. Ol arapela lida i mas helpim tu long kamapim ol mesa.

Pater Kim i save lukautim 3-pela peris na em bai mekim wankain sevis i go long Nondi na Yuri, tasol i dipen long ol risos.