INDIA i rekotim gen narapela kalap bilong COVID-19 long wanpela de tasol long Mande dispela wik.

Dispela kalap bilong namba bilong COVID-19 i mekim India nau i abrusim Brazil husat namba bilong COVID-19 i bin antap tru.

Long Mande tasol India i lukim 168,912 nupela keis na dispela i surukim namba bilong COVID-19 keis i go long 13.5 milien. Long Brazil 13.4 milien keis ol i rekotim.

Insait long 24 aua tasol India i lukim 904 indai na dispela i apim namba bilong indai long COVID-19 long India i go long 170,179.

India nau i stap long namba foa ples nau namel long ol kantri i lukim bikpela namba bilong indai i kamap long COVID-19. United States bilong Amerika i stap namba wan, Brazil namba tu na Mexico i stap namba tri.

India i stap long mak nogut nau long wanem dispela nupela kalap bilong COVID-19 i kamap long taim kantri i sot tru long ol veksin. Na ol haus sik i sotwin tru long lukautim olgeta sikmanmeri.