DISPELA likik kantri i lukim narapela salens gen taim em i kisim bagarap bilong COVID-19.

Bikpela ren na ol wara i tait na graun i bruk long Ista wiken.

Tait wara na graun bruk i kisim laip bilong klostu 40 pipel; man, meri na pikinini, na bagarapim ol haus, rot na bris long wiken.

Kepitol siti bilong Timor Leste, Dili em i kisim bikpela bagarap na stap aninit long wara long dispela taim.

Long dispela taim tu Timor-Leste i kisim namba wan COVID-19 veksin na tu tokaut long namba wan indai i kamap long COVID-19.

Timor-Leste em i wanpela liklik kantri long Saut Esia wantaim 1.3 milien populesen. Em i bin stap hap bilong Indonesia tasol long 1999 bihainim laik bilong em long sanap em yet United Nation i bin helpim em long bruk lusim Indonesia.