SAMOA i stap long wanpela mak nau long politik bilong en we i sakim olpela kain lidasip long longpela taim tru we ol man tasol i save go pas long en.

Nau yet ol pipel i wet long harim wanem risal bilong ileksen bilong ol long wanem wanpela meri i givim gutpela resis tru long narapela pati em i resis wantaim.

Ol pipel i laik lukim sapos Fiame Naomi Mata’afa bai i kamap namba wan Praim Minista bilong Samoa. Dispela bai i pinisim olpela taim we Tuilaepa Sailele Malielegaoi i bin holim olsem Praim Minista inap 23 yia olgeta.

Samoa palamen i gat 51 sia. Long dispela resis bilong praim minister tupela pati Human Rights Protection Party na Fa’atuatua i le Atua Samoa ua Tasi Pati (FAST) i winim 25 sia. Nau wanpela independen kendidet husat i resis namba wan taim bai I mekim disisen long wanem sait em bai i joinim.