Polis long Solomon Ailan i tok ol i no inap banisim gut boda long Westen Provins wantaim Papua Niugini long banisim kalap bilong COVID-19 sapos i nogat helpim i kam long ol komyuniti long ol provins bilong Westen, Choisel na Malaita.

Neiba bilong ol PNG i lukim COVID-19 i sut i go antap hariap tru na namba nau em 5,000. Insait long dispela namba i gat planti tu long Bogenvil.

Deputi Komisina Juanita Matanga i tok Westen boda wantaim PNG em i draipela tumas na ol i nogat inap risos na polismanmeri long banisim gut boda.

Matanga i tok wanpela rot tasol bilong pasim COVID-19 long kalap long boda em long ol pipel husat i stap long boda i mas stop long kalapim boda.

Las wik PNG tu i putim tambu pinis long kalapim olgeta tredisinel boda.

Redio Nu Silan