OLGETA de ol pipel long Myanmar i mas mekim ol hatpela disisen taim bikpela taim nogut taim bikpela ol protes i kamap long ples bilong ol.

Ol pipel i protes long wanem ol i laikim gavman bilong ol i mas go bek long han bilong ol pipel we ol yet i makim bihainim demokretik proses bihain long ol ami i kisim gavman long Februeri 1, 2021 bikos ol i tok planti paul pasin i bin kamap long ileksen long las yia.

Ol United Nations i tok 149 pipel i dai pinis insait long dispela ol protes stat long Februeri 1 tasol ol i bilip olsem planti moa i dai na ol i no kauntim.

Wanpela meri, nem bilong em Naw, husat i sanap na protes wantaim olgeta arapela pipel long Myanmar i tok, em i memba bilong wanpela grup husat i save protes planti taim na nau em i protes long singaut long ol ami i mas lusim lida bilong ol na Stet Kaunsila Aung San Suu Kyi na Presiden Win Myint i go fri na ol i mas putim aut tu verifikesen bilong 2020 ileksen risal.

Naw i tok, “Mipela ol liklik lain i gat bikpela diman. Driman bilong mipela em long kirapim wanpela federel demokretik yunien wantaim olgeta nesenaliti bilong Myanmar.

Ol ami i ranim gavman wantaim pasin bilong brukim mipela na rulim mipela. Tasol olgeta nesenaliti i kam bung wantaim pinis na mipela i sanap wantaim.

Mi gat wanpela pikinini meri. Em wanpela bilong dispela ol nesenaliti.

Naw i tok pastaim long em i go protes em i toktok wantaim man bilong em. Em i askim man bilong em long lukautim pikinini meri bilong tupela sapos ol ami i arestim em o em i lusim laip bilong em long protes.

Naw i strong olsem ol i mas pinisim dispela pait nau yet na i no ken larim i go yet na givim i go long ol pikinini bilong ol.