ELI Web, wanpela meri Papua Niugini husat i bin sik long COVID-19 i tok ol pipel bilong PNG i mas no ken ting olsem dispela sik em giaman samting tasol.

Em i bin tes positiv long COVID-19 long Brisbane, Australia bihain long em i lusim Pot Mosbi  na go long Brisbane na ol i testim em bihain long sampela de taim em i stap long kwarentin.

Mis Webb i tok dispela COVID-19 i mekim em i pilim sik bikpela tru winim taim em i save kisim sik malaria.

Em i tok em i laki i gat gutpela sevis long haus sik long Brisbane.

Em i laikim ol pipel i mas luksave long dispela long dispela taim long wanem namba i go antap abrusim 2,000 pinis long PNG na mak bilong ol positiv keis i sut i go antap hariap tru.

Planti pipel long PNG i wok long tok ol i no bilip long dispela sik COVID-19 olsem em i trupela sik na ol i no laik harim tok bilong ol lida long lukautim helt bilong ol.