HELT Minista bilong Solomon Ailan Dokta Cullwick Togamana i tok ol pipel bilong Solomon Ailan i mas bilipim ol saintis na dokta long pablik helt na kisim AstraZeneca COVID-19 veksin taim em i kamap long kantri.

Dokta Togamana i bin mekim dispela toktok long Trinde las wik taim gavman i redi long lonsim COVID-19 Veksin Program bilong em.

Solomon Ailan i kisim pinis 24,000 AstraZeneca veksin long Fraide long wik i go pinis. Dispela veksin i kam long Covax fesiliti long India. UNICEF i bin redim wok bilong kisim dispela veksin i go long Solomon Ailan.

Dispela em i namba wan hap bilong 108 tausen dos bilong ol veksin we i kam long Covax fesiliti. Ol bai i givim sut long 20 pesen bilong pipel bilong Solomon Ailan na ol bai i stat wantaim ol franlain woka na olgeta komyuniti i stap klostu long boda wantaim Bogenvil.

Dokta Togamana i tok, long soim dispela veksin em i seif Praim Minista Manasseh Sogavare na em yet bai kisim sut pastaim long Solomon Ailan.