HET toktok bilong dispela Intenesenal Wimen De 2021 em ‘Susim long Salensim’ (Choose to challenge).

Astingting bilong United Nations taim em i bin statim Intenesnal wimen de em bilong selebretim o luksave na amamas long ol wok em ol meri i save mekim long ol komyuniti bilong ol, ol wok em ol i save mekim long helpim ikonomi bilong ol kantri bilong ol na tu ol famili bilong ol, ol pasin tumbuna na ol wok politik.

Stat long taim United Nations i bin statim dispela de bilong ol meri, planti gutpela samting i kamap pinis long sait bilong kamap bilong ol meri long ol displa sekta we mi kolim pinis, tasol long sampela kantri, sampela long ol dispela samting i no kamap gut yet.

Namel long ol em olsem long ol wok politik we long Pasifik rijon, long Melanesia, liklik lain meri tasol i stap long ol wok politik.

PNG na Vanuatu i no gat ol meri long ol haus palamen, na Solomon Islands i gat foapla meri tasol i stap long palamen. Maski foapla tasol, em i winim PNG we i gat 111 sia long palamen na i nogat wanpela meri long bikpela populesen long klostu 9 million taim Solomon Islands i gat 700 tausen populesen tasol.

Na bilong makim Intenesenel wimen de long Solomon Islands, ol meri na pipel i bin mas long ol strit long Honiara, na wanpela bisnismeri bilong Solomon Islands i yusim dispela bikpela de bilong ol meri long askim ol meri long wok strong long kamapim ol bisnis bilong ol yet. Ruth Maetala Menesing Dairekta, bilong Dignity Pasifik nau i mekim dispela toktok.

Long dispela Intenesenal Wimen De, wanpela Papua Niugini lidameri husat i nau Presiden bilong Wes Sepik Provinsal Kaunsil bilong Meri, Dorothy Tekwie i tok vailens egensim ol meri long i kamap bikpela tru na i nau stap olsem wanpela nesenel kraisis long PNG.. na gavman i mas putim planti risos long stopim olsem em i wokim long coronavirus.

Long Melanesia, ol wok politik i stap yet long han bilong ol man, na meri husat i save sapotim humen rait long Vanuatu, Jenny Ligo i tok em i laik lukim ol meri insait long ol wok politik long Vanuatu.

Long dispela tripela kantri bilong Melnanesia; Papua Niugini, Solomon Islands na Vanuatu, ol wok bilong kukim kaikai, planti kaikai na mekim maket bilong painim mani em i save stap long han bilong ol mama. Long Gizo maket long Westen Provins, Solomon Islands bai yu lukim ol mama tu i save sindaun long maket na salim ol kaikai o hankraf bilong lukautim ol famili bilong ol. Dispela em lukluk na save bilong Presiden bilong provinsal kaunsil bilong meri long Westen provins bilong Solomon Islands. Poto: Rendy Solomon.