SAMTING olsem 500 pipel bilong Papua Niugini husat i stap long Vanuatu i holim haus krai tu long Pot Vila bihainim dai bilong bikpela lidaman bilong PNG, Gren Sif Sir Michael Somare.

Wankain olsem ol haus krai long Papua New Guinea, Australia, na ol narapela kantri ol PNG pipel long Vanuatu i bin statim haus krai long Sande i go pinis na ol i rausim haus krai bilong ol long Fonde las wik.

PNG komyuniti long Poit Vila wantaim opis bilong Melanesian Spearhead Grup (MSG) Secretariat i bung wantaim long soim rispek long Sir Michael.

PNG Honoreri Konsul long Vanuatu, Aileen Nganga i tok maski ol liklik lain tasol, ol i soim bikpela rispek long papa bilong kantri bilong ol.

Narapela komyuniti lida bilong PNG long Pot Vila, Katolik Bisop John Bosco Baremes bilong Bogenvil, husat i bin go pas long wanpela Misa bilong Sir Michael long Sande, na em i tok em i tingim na luksave long Sir Michael stat long taim em i bin stap yet long praimeri skul.