WANPELA bodigad bipo bilong Gren Sif Sir Michael Somare i tok, Sir Michael em i bin wanpela man bilong marimari na i save lukautim gut ol wok lain bilong em.

Dispela em lukluk bilong Ekonia Puki bilong Is Nu Briten Provins husat i bin bodigad na i wok klostu tru wantaim Sir Michael inap long 23 yia olgeta.

Mista Puki i bin lukautim na raun wantaim Sir Michael long planti hap long wol taim em i bin Praim Minista, na i save gut long Gren Sif.

I no planti taim bai wanpela lida i save luksave gut long gutpela wok bilong wanpela wok lain bilong em, i gat bilip na tras long en, na i lukim olsem em tu i hap bilong famili bilong en - tasol em ia em i tru long lukluk bilong Sir Michael long Ekonia Puki.

Dispela i kamaut klia taim pastaim long em i bin pasin ai bilong en long namba 26 de bilong mun Februeri long Pot Mosbi, Gren Sif Sir Michael Somare i bin askim Mista Puki long go na stap wantaim em na famili taim em i bin sik nogut tru long sik kensa.