GUADALCANAL Primia, Francis Sade i tok dispela tambu long salim graun long provins em stap insait long wanpela provinsal odinens o lo bilong menesim graun.

Graun na olgeta samting antap long graun, olgeta bikpela wara na liklik wara, ol rif na solwara em samting we i impotem tumas long long kastom, kalsa an laip bilong olgeta pipel long Melanesia na Solomon Islands tu.

Long Solomon Islands kastom, graun em bilong ol traib na olgeta klen, maski sapos em ol sosaiti i matriliniel, we graun i kam long mama o patriliniel, we graun i kam long papa

Tasol nau dispela taim i gat presa na nid long salim graun long inapim kain stail bilong sindaun long dispela taim. Planti man bilong Guadalcanal, moa yet em ol lain i raun stap long Honiara Siti na Not sait bilong ailan i no bihainim kastom na go het na i save salim graun bilong traib bilong ol.

Kain pasin bilong salim graun we pipel bilong ol arapela provins i baim tu, na dispela i kamapim planti hevi na tu I bin kamapim bikpela etnik konflik we i bin bagarapim Solomon Islands stat long 1998 inap taim RAMSI (Regional Assistance Mission to Solomon Islands) i bin go helpin ol long 2003.

Primia Francis Sade i luksave long olgeta kain hevi we I kamap long graun na divelopmen long provins, olsem na gavman bilong em i kamapim sampela odinens pinis stretim sampela bilong dispela ol hevi.

Wanpela bilong ol odinens em long graun menesmen wei stopim ol pipel long provins long salim graun bilong ol.

Primia Sade i tok strong long olgeta lenona grup long patna wantaim ol investa na wok wantaim gavman long divelopim graun bilong ol.