NEM bilong Gren Sif Sir Michael Somare i bikpela long Papua Niugini.

Dispela nem i go moa long ol arapela rijon na kantri tu.

Dispela i lukim ol lida bilong ol arapela kantri na manmeri wantaim i salim tok sori bilong ol long harim dai bilong em.

Namel long ol em Praim Minista bilong Australia Scott Morrison.

Mista Morrison long Australia Brocasting Corporation (ABC) i tok Sir Michael i gat bikpela nem long histori bilong Papua Niugini.

Em i tok Sir Michael i bin go pas long kamapim Mama Lo bilong kantri, wanpela man husat aninit long Komenwel kantri long stap praim minista planti yia na i wanpela man we no gat wanpela lida long PNG inap kisim ples bilong em.

Long ol dispela taim, Sir Michael i kamapim gutpela wok poroman wantaim tupela kantri, PNG na Australia.

Mista Morrison i tok Sir Michael i bin wok gut long namba wan taim wantaim Gough Witlam na bihain Malcom Fraser, Bob Hawke, Bob Howard, Kevin Rudd na Julia Gillard.

Em i tok Sir Michael i wanpela strongpela mani i strongim demokrasi na Westminista sistem we wan wan han bilong gavman olsem ekseketiv, lejisletiv na judiseri i mas stap na wok bilong ol yet.

Em i tok bikos long dispela komitmen, Papua Niugini nau i stap olsem wanpela kantri.

Praim Minista bilong Nu Silan Jacinta Ardern long Radio New Zealand i tok em na kantri bilong em i salim tok sori bilong ol i kam long Ledi Veronica, ol pikinini na Papua Niugini olgeta long dai bilong Sir Michael.

Em i tok Sir Michael i bin go pas long PNG long kisim Independens na tude i kisim luksave olsem “Papa bilong Kantri.”

Em i tok Sir Michael i kamapim kain lidasip we ol arapela lida long Pasifik i ken lukim na bihainim.

Long Fiji Times Fiji Praim Minista Sitiven Rambuka i tok Fiji i sori long lusim wanpela gutpela pren bilong em.

Em itok em i ken tingim we Sir Michael i kolim em “Siti” na Raut Sir Peniaia i kolim em “Buka” na Ratu Sir Kamisese Mara i kolim em moa olsem Kenol (Colonel) na bihain Komanda bilong Fiji ami.

Em i tok Sir Michael i kamapim gutpela wok poroman pasin namel long tupela kantri.

Solomon Times i tok Praim Minista bilong Solomon Ailan Manasseh Sogavare i tok Sir Michael i wanpela strongpela lida long kantri.

Em i tok Sir Michael i wanpela longtaim politik man na i wanpela man ol arapela lida long rijon i ken lukluk na kisim strong long em.

Em i sori olsem PNG i lusim kain man olsem.

Oposisen lida bilong Vanuatu Raph Regenanu long Vanuatu Daily Post i tok Sir Michael i wanpela “legend” bilong Pasifik.

Em i tok Sir Michael i bin go pas long kamapim Melanesia Spearhead Group (MSG) i bin save kamapim ol gutpela tingting long dispela grup.
“Mipela i salim bikpela tok sori bilong mipela i go long famili bilong Sir Michael na ol pipel bilong Papua Niugini.”

Mista Ragenanu i toke m i salim tok sori bilong em tu long Dulciana husat i wanpela gutpela poroman bilong em.