MEMBA bilong Saut Bogenvil na Minista bilong Infomesen, Komyunikesen na Teknoloji, Timothy Masiu i givim strongpela toktok i go long ol polis bilong Bogenvil i mas mekim wok painimaut na holim ol bikhet lain husat i bin kalapim boda na kros pait wantaim ol polis long Solomon Ailan.

Mista Masiu i tok ol dispela kain lain em ol “hooligan” o ol yangpela bikhet man husat i save mekim asua na givim nem nogut long Bogenvil.

Ol i nogat rispek long lo bilong boda long narapela kantri.

Sif bilong Bogenvil Polis, Francis Tokura i tokim Solomon Times olsem polis fos long Bogenvil i nogat kepasiti na risos bilong patrol na putim was long boda bilong ol.

Mista Masiu i tok em i bin givim sampela helpim i go long polis fos bilong Bogenvil long helpim ol long lukautim boda.

Em i laik ol i mas painimaut na holim ol dispela lain husat i mekim dispela bikhet pasin.