“BIKPELA wari i stap olsem ol tok lukaut bilong COVID-19 i kam long Bogenvil Gavman i no kamap gut long ol pipel” Ekseketiv Dairekta bilong Leitana Nehan Wimen Ejensi, Helen Hakena i tok.

Em i tok maski namba bilong ol pipel i kisim COVID-19 i go antap kwiktaim, ol pipel i no bihainim ol lo na oda.

Bogenvil i bin stap fri long COVID-19 long yia 2020 inap nau long dispela taim nau (2021) we namba i wok long go antap kwiktaim.

I bin gat 31 keis long Mande, tasol namba i wok long go antap yet, wankain long PNG.

Mis Hakena i tok ol liklik lain tasol i wok long werim mas na prektisim sosol distensing. Na wankain taim i no wok long raun tumas.

“Mi lukim ol pipel i go kam yet insait long dispela liklik taun long Buka. Maket i op. Ol manmeri i sanap stori long ol bikpela grup. Dispela i soim olsem ol pipel i no kisim gutpela tok lukaut” Hakena i tok.