Papua Niugini gavman i mas i gat gutpela plen pastaim long em i ken go het long surukim wok long Pacific Marine Industrial Zone (PMIZ) long Madang provins.

PNG Fishing Industry Association Presiden, Sylvester Pokajam i tok olsem ol toktok nau long kamapim wanpela moa pis plent long Daru long Westen provins em ol mauswara toktok na bai no inap karim kaikai.

Em i tok Daru i no ples bilong ol i mekim bikpela komesel pis na gavman i mas strongim wokbung na polisi long Madang wantaim lokol gavman na ol pipel long kirapim PIMZ long provins.

Toktok bilong PIMZ i bin stat long 2004 na long 2019, aninit long Praim Minista bipo Peter O'Neill, gavman i laik kisim dinau mani mak long $US168 million long mekim wok long hap tasol wok i bin stop.

Las yia PNG gavman i toktok gen long wankain divelopmen long Daru we mani mak long $204 million bai go insait long divelopim tasol dispela tu i gat planti tok pait i stap yet long en.

Hilda Wayne