PRESIDEN Joe Biden long dispela wik i askim ol pipel long Amerika long luksave long dispela 500,000 indai wantaim liklik taim long sarap long Mande.

Em i givim oda tu long olgeta plak i mas go daun long hap mak long 5-pela de olgeta.

Insait long 5-pela wik i go nau COVID-19 i kilim klostu 100,000 pipel na nau dispela sik i abrusim sik bilong lewa, kensa na ol arapela sik na i stap namba wan sik bilong kilim ol pipel.

Stat long Februeri las yia dispela sik I kilim ol pipel na dispela yia em i kilim klostu 2,000 pipel long olgeta de.

Wanpela Imejensi Dokta Richina Bicette i tok, “USA i kamap long dispela mak nau long wanem long stat em i bin isi isi taim mipela i bin gat planti taim. Mipela i lukim wanem samting i kamap long China. Mipela i lukim COVID-19 i spit tru na bagarapim Europe na mipela i no redi hariap long banisim dispela sik taim em i kam.”

Dokta Bicette i tok ol arapela savemanmeri i tokaut pinis long sot bilong pesenel protektiv ikwipmen (PPE), ol saplai bilong mekim sekap, na kepesiti bilong mekim kontek tresing we inap seivim laip.

“Sapos mipela i bin putim ol helt mesa long las yia mipela i no inap stap long dispela mak nau,” narapela dokta Camara Phyllis Jones i tok.

Sampela I tok nau em i no taim bilong stap isi. Mipela I no laikim ol pipel i rausim ol pesmask na ting olgeta samting bai i orait, wanpela narapela dokta, Dokta Ali Mokdad i tok.