OL G7 lida i tok promis pinis olsem ol by strongim wok bung bilong ol long COVID-19 na apim kontribusen bilong ol long wok bilong serim Covax veksin.

Long wanpela stetmen olgeta i putim aut bihain long wanpela samit ol i holim onlain las wik Fraide ol i apim komitmen bilong ol i go long US$7.5 bilien.

Ol ris kantri i kisim planti sut tok long ol i mas sapotim tu ol kantri we i no save mekim planti mani long givim ekses long ol long kisim ol veksin tu.

Long dispela samit US Presiden Joe Biden i tok promis olsem kantri USA bai i givim US4 bilien. Ol bai i givim US$2 bilien long 2021 na bihain insait long tupela yia bai ol i givim narapela US$2 bilien.

Jemeni i tok em bai i givim US$1.2 bilien. Sensela Angela Merkel i tok dispela pandemik I no pinis yet inap olgeta pipel i kisim veksin.

European Union (EU) tu i mekim komitmen long apim mani mak em bai i putim.

Ol G7 kantri em USA, UK, France, Germany, Italy, Canada na Japan.