SUPRIM Kot bilong Vanuatu i givim mekim save long olpela praim minista bilong kantri, Charlot Salwai. Kot i painim olsem em i bin asua long tupela sas namel long tripela sas.

Long mun Janueri, kot i bin painim olsem em i bin gilti o asua long sas bilong perjury, o giamanim kot.

Tasol Mista Salwai bai i no inap go kalabus. Jas i givim em tupela yia suspendet sentens. Na Salwai bai no inap stap olsem memba bilong Pentecost long palamen bilongVanuatu.

Em i gat 14 de long apil long dispela mekim save kot i bin givim long em.

Mista Salwai i bin kamap long kot bihain long em i bin kamapim ol posisen bilong palamenteri seketeri insait long gavman long 2013.