LAS WIK ol pipel bilong Wes Papua i lusim wanpela lidaman bilong ol husat i bin pait strong long kisim independens, na tu, em i save toktok strong egensim ol hevi bilong human raits long Wes Papua.

Dispela lida, Fred Christian Mambrasar is tap long Papua Niugini na em i save wok strong long mekim PNG gavman i luksave long 10 tausen refuji bilong Wes Papua, na givim PNG sitisensip long ol.

Fred Mambrasar em i bilong Biak ailan. Em i bin ranawe wantaim planti ol arapela Wes Papua pipel bikos long planti hevi gavman bilong Indonesia i bin kamapim long ples bilong ol. Ol i kalapim boda na kam insait long PNG long 1984.

Insait long samting olsem 37 yia, i kam inap long taim em i bin dai las wik, em i bin givim laip bilong em long helpim ol pipel bilong Wes Papua long olgeta hevi bilong ol.

Wanpela long ol PNG lida em Mista Mambrasar i bin wok klostu wantaim em NCD Gavana, Powes Parkop. Gavana Powes Parkop i bin givim bikpela tok sori bilong em long famili bilong Mista Mambrasar na ol pipel bilong em.

Kenn Mondia, Ekseketiv Dairekta bilong Partners with Melanesians em i siaman bilong PNG Union For Free West Papua. Dispela grup i karamapim sampela ogenaisesen i sapotim Wes Papua fridom na human raits.

Mista Mondiai i tok Mambrasar em i gat bikpela komitmen tru long helpim ol pipel bilong en. Em it ok olsem Mambrasar i dai pinis, tasol yunion bilong ol bai gohet wantaim ol wok bilong em long PNG.

Bikpela hap toktok bilong Fred Mambrasar we i stap long tingting bilong ol sapota bilong Wes Papua nau em, "West Papua's struggle for independence is not just West Papua's struggle, but Melanesia's struggle, and the people of Melanesia must take ownership". Em singaut bilong Fred Mambrasar long ol arapela pipel bilong Melanesia long helpim ol pipel bilong Wes Papua.

Long dispela krai bilong ol Wes Papua, planti pipel long Melanesia long Fiji, Vanuatu, New Caledonia, Solomon Ailan na PNG i kamapim ol muvmen bilong ol yet bilong helpim dispela hevi bilong ol Wes Papua.

Long Solomon Ailan, i gat muvmen ol i kolim Solomon Islands in Solidarity with West Papua. Mausmeri bilong ol, Grace Hilly i tok em i sori tru long dai bilong Fred Mambrasar. Em i tok Mambrasar em i wanpela lidaman tru bilong ol pipel bilong em.

I gat tok sori i kam long olgeta hap long wol long dai bilong dispela lida bilong Wes Papua husat i bin pait long hevi bilong human raits longpela taim tru.

Lida bilong Free West Papua Campaign, Benny Wenda tu i salimg tok sori bilong em na ol pipel bilong em long dai bilong Fred Mambrasar.