Ol 14 pipel i bin dai na planti ol hevi i kamap long Hela provins bihain long traibel pait i bin kamap na bagarapim ol manmeri na pikinini long tupela wik i  go pinis.

 Gavana bilong provins, Philip Undialu i bin wok long kamapim ol bikpela divelopmen projek long provins na nau hevi long lo na oda i mekim em i tingting planti.

Mista Undialu i bin go long provins na i wok long traim long stopim moa hevi i kamap.

Em i tok taim dispela pait i bin stat, em i bin askim ol opisa long PNG Defence Force husat i stap long PNGLNG sait long helpim long stopim dispela pait, tasol dispela helpim i no bin kamap.

Em i tok nau yet, ol lida long komyuniti i wokbung yet long stopim moa pait long suruk i go yet na em i askim ol pipel long lusim dispela kain pasin bilong pait. Em i tok planti lain i lusim laip pinis long pasin bilong traibel pait long provins bilong em.